એક બે નહિ અપાર વાવીશું (રાકેશ હાંસલિયા)

એક બે નહિ અપાર વાવીશું ,

આ હવામાં વિચાર વાવીશું

જ્યાં કદીયે કશું નથી ઊગ્યું, 

એ જગાએ ખુમાર વાવીશું

નાત તડકાની છો થતી દુશ્મન, 

એક વડલો ધરાર વાવીશું .

રાહ તારી ફરી ફરી જોવા, 

આંખમાં ઇન્તેજાર વાવીશું

જીદ કરી છે જો વાવવાની તો, 

સાવ થઇને ખુવાર વાવીશું

પથ્થરો તોડીને ઊગી નીકળે, 

સઘળું યે ધારદાર વાવીશું

આ જગતના ખૂણે ખૂણે 'રાકેશ', 

લાગણીની જુવાર વાવીશું

                             (રાકેશ હાંસલિયા)